တိုင်ဖုန်းမုန်တိုင်းရာဂီ ဝင်ရောက်တိုက်ခတ်ခဲ့မှုကြောင့် မြန်မာနိုင်ငံ၏ ပြည်နယ်နှင့်တိုင်းဒေသများက ရေဘေးဒဏ် အပြင်းအထန် ခံစားနေရသော အများပြည်သူများ၏ ဆုံးရှုံးမှုအတွက် Grand Royal Group International မိသားစု အနေနှင့်လည်း ထပ်တူကြေကွဲဝမ်းနည်းရပါသည်။
လက်ရှိတွင်လည်း အချို့ဒေသများတွင် ပြန်လည်ထူထောင်ရေးအတွက် ကြိုးပမ်းနေကြသည်ကိုလည်း သတင်းနှင့် လူမှုကွန်ရက် စာမျက်နှာများ က တစ်ဆင့် ကြားသိနေရပါသည်။ ထိုသို့ ပြန်လည်ထူထောင်ရေးလုပ်ငန်းများ လုပ်ဆောင်နေမှု အပေါ် Grand Royal Group International အနေနှင့်လည်း နယ်ခံပရဟိတအဖွဲ့အစည်းများနှင့် ပူးပေါင်းကာ ရေဘေးအန္တရာယ်အပြင်းအထန် ခံစားနေရသော သာဝတ္ထိ၊ တပ်ကုန်း၊ လယ်ဝေး၊ ရမည်းသင်း၊ ပျော်ဘွယ်၊ ကလောနှင့် အင်းလေးဒေသများ အပါအဝင်၊ အခြားသော ရေဘေးသင့် ဒေသများ သို့ ပြန်လည်ထူထောင်ရေးအတွက် မရှိမဖြစ်လိုအပ်သော အခြေခံအသုံးအဆောင်များနှင့် အိမ်သုံးပစ္စည်းများအား ရေဘေးသင့်ပြည်သူမိသားစုပေါင်း မြောက်မြားစွာအတွက် အုတ်တစ်ချပ်သဲတစ်ပွင့် အနေနှင့် ကူညီလှူဒါန်းခဲ့ပါသည်။
ရေဘေးသင့်ပြည်သူများအနေနှင့်လည်း ပြန်လည်ထူထောင်ရေးလုပ်ငန်းများပြုလုပ်ရာတွင် လိုအပ်လျက်ရှိသော အထောက်အပံ့များ ရရှိပါစေကြောင်း Grand Royal Group International မိသားစုက ဆုတောင်းမေတ္တာပို့သလိုက်ပါသည်။
